JEAN Baptiste Byumvuhore

  Kabe mu kabindi

Kera  habayeho umwami w’u Rwanda akitwa Rwabugiri rwa Rwogera rwa Gahindiro, izina ry’ubwami ni Kigeli, umugabekazi bimanye yari mukakigeli Murorunkwere muka Nkoronko aliko ngo ntabwo basazanye kubera umazimwe y’abari abatoni I Bwami.

Rwabugili ngo yari intwali cyane yâguye igihugu akigeza iyo giterwaga inkingi

Mu ngabo ze zitwaga inganguragugo habagamo abagabo b’intwali koko

Ngo bajyaga bashaka umwanya bagatereka inzoga ubundi bakajya mu mihigo

Umunsi umwe uwitwa Rwanyonga rwa Mugabwambere aza guhiga n’umwami

Ngo yari umugabo uhamye koko kandi ngo yarushaga ubutwali Rwabugiri

Na Rwabugiri yari abizi aliko akamukundara ko yamwubahaga kandi akamurasanira akamukiza abamuteraga.

Umunsi umwe rero bagiye mu mihigo, bityo Rwabugiri azimanira umushyitsi we

Ni inanga ya Rwishyura Appolinaire aho atangira agiraga ati :

« Kunda uvuge wa nanga we uli inanga ndi umuntu kandi uri umungo ndi umuntu, nakuramvuye ku gishushu kwa Karago na Mwendo ibishwi bishaka kuzakunnya hejuru »

Ati : « ukunde uvuge nanjye nibwirire abahungu ibigwi n’imyato ya Rwanyonga yewe »

Rwanyonga ati « uri umugabe ndi umugabo kandi uri umwami ndi umwana aliko twanganye twarwanye kandi n’ubundi amaherezo tuzarwana, »

Ati « aho wamvugishirije ko numva inyota igiye kuzamfata wampa inzoga nkinywera Rwabugiri, Ati « Rwanyonga ko uri umwana inzoga naguha naguha ingana iki ? »

R/ Rwabugili,Kabe gakeya, kabe gakeya kabe mu kabindi ndakwinginze

Rwabugili, Kabe gakeya, kabe gakeya kabe mu kabindi na none ndaje x2

Ngize nti zana inzoga ninywere

kandi uramenye uzane inkwiye

Uli mwene Rwogera nkaba mwene Mugabwambere

Gerageza unzanire ninywere Rwabugili

Niba ali ntazo kwa Data zirahateretse

Amaze ukunde ugaruke nkwinginge nti:

R/

Ubonye igihe naguhereye ntwali

Nkwinginga, nkwibasira, nkwisabira

Ngo ukunde unsindire inyota

Ngo nkunde na njye, ngukundire nkomeze imihigo dutaramire izindi ntwali

Dohora ngiyi rubanda irareba mwami

R/

Urashyira mu mumuna , Nkakurahira kwa Muvunyi

Urashyira mu kabindi , kati bomboli bomboli

Wateruza kanywabahizi, iti bomboli bomboli

Washyiramo umunanira, nkawuhangamura nkayisoma yose

Ko unyicishije inyota se kandi mwana wa Rwogera

R/

Dore ntahanye icyaka kirenze inyota nahingukanye Rwabugili

Kandi ngo ugira amagambo ukagira n’ayakurenze

Urandinde kuzumva ko watoboye ukabwira rubanda ngo :

« Ngo wanyiciye inyota kandi ngiyi ndayitahanye

Watsinze Rwanyonga kandi nguhiga ubutwali

Ntabwo  nkunda urugambo, na we urarundinde”

Ndamutse mbyumvise, aho tuzahurira

Ntihazamera icyatsi Mwami nyiri u Rwanda, ndabikumenyesheje

Ati « fata umuheto nanjye mfate uwundi tujye kugeranwa ku karubanda »

Ni uko Rwabugiri atwara imyambi eshatu Rwanyonga ajyana umwe rukumbi

Barageranywa Rwabugiri arabanza ashyiramo imbaraga zose uruhembe rwo hejuru n’urwo hasi byenda guhura ararekuza, Rwanyonga awitegereza uza awutega ikiganza awufatishya agahera abwira Rwabugiri ati nyongera nabikubwiye. Rwabugiri arongera aratamika ararekuza, rwanyonga awutega ikirenge awufatisha ino lihera.

Umwambi wa gatagara uza urusha iyindi amakare Rwanyonga awutega uruhembe rw’umuheto arawutora ati « ndakurashisha uyu wawe ni wo utaribukwice ».

Rwanyonga ati « umwambi n’umuheto ni ibya data Mugabwambere jye si ndi umurashi »

Yarawurekuye Rwabugiri ataratamba icyuya kiramurenga ajya hirya umwambi uja hirya, aja hino uja hino umwambi uragenda umufata ino rinini.

Ati twageranwaga reka ntitwarwanaga Rwanyonga Nti ndaguhakaniye

Ati yirase mu cyico se kandi ngiyo iravumbutse Rwanyonga, Nti ndaguhakaniye 

Ati yikorere se maze ujye imbere ndakureba bityo ducyure umuhigo Rwanyonga

Nti ndaguhakaniye

Nti nabikubwiye: “ mwami w’u Rwanda ntundusha kumasha”

Nti nabikubwiye: “ mwami w’u Rwanda ntundusha kuzibukira”

Nti nabikubwiye: “ mwami w’u Rwanda ntabwo undusha kubonesha”

Nkunze ko uri umugabo, Umugaba w’ingabo kandi uzibanza imbere

Ukazihiga ubutwali izindi zishaka imirwano

Ugahangana n’amahanga akakuyoboka

I Ndorwa n’ubunyabungo             bemeye kuyoboka

Ubugoyi  n‘umurera                     bemeye kuyoboka

Ubushiru n’ubufumbira                 bemeye kuyoboka

Igisaka n’ubugesera                    bemeye kuyoboka

Ubudaha n’ubukunzi                    bemeye kuyoboka

Mu ishoba n’ubusozo                  bemeye kuyoboka

Ubukonya no mu kingogo            bemeye kuyoboka

U Bwishaza n’urusenyi                 bemeye kuyoboka

Igitero cyo mu Butembo                Nakigiye imbere

Icyo mu Kanywiriri                         Nakigiye imbere

Igitero cyo mu Bushubi                 Nakigiye imbere

Nakwiciye Kabego                        n’Idjwi rirayoboka

Nkwicira na Kalinda                      U Butembo burayoboka

Nica uwitwa Kibogora                   U Bushubi burayoboka

Aho hose nagiye                           Nagarukanye iminyago

Ndetse n’imbere y’abakembe        Nagarukanye iminyago

Imbere y’Inzirabwoba                   Nagarukanye iminyago

Imbere y’Abemeranzigwe             Nagarukanye iminyago

Ni uku ungenje se ntwali nafashije kwagura u Rwanda, Mwami nyiri u Rwanda

Amaraso unyoye ni menshi, azagusama

Wambwiye ngo tujye kumasha,      Ushaka kunsinda iyo

Umbwira ngo tujye guhiga             Ugamije kunsinda iyo

Unsaba gucyura umuhigo              Ngo njye imbere uhansinde

Unsaba kukwicira Kabago             ushaka kunsinda iyo

Unsaba no kuba umukwe wawe     Ugira ngo umunsindeho

Kubera amaraso wanyoye           Ntuzahambwa mu rwanda

Wishe nyoko wakubyaye             Ntuzahambwa mu rwanda

Kandi wica Nkoronko                  Ntuzahambwa mu rwanda

Unyishe ndi umukwe wawe          Ntuzahambwa mu rwanda 

Unteze umukobwa wabyaye        Ntuzahambwa mu rwanda 

Ibikundanye birajyana                 Ntuzahambwa mu rwanda 

Kubera amaraso wanyoye           Ntuzahambwa mu rwanda

Dore umuhungu wakunze            Ntuzahambwa mu rwanda

Uzaraga ingoma yawe                Ntuzahambwa mu rwanda 

Azicwa n’umugore wawe            Ntuzahambwa mu rwanda 

Inkundwakaza yawe                   Ntuzahambwa mu rwanda 

Kubera amaraso wanyoye           Ntuzahambwa mu rwanda

Intwali yawe Bisangwa                Ntuzahambwa mu rwanda 

Azicwa na muramu wawe            Ntuzahambwa mu rwanda 

Ikigeli nkawe kizima                    Ntuzahambwa mu rwanda 

Kizavuka i mahanga                    Ntuzahambwa mu rwanda 

Kandi kizasubira iyongiyo            Ntuzahambwa mu rwanda

Kandi na we nkubwire                  Ntuzahambwa mu rwanda 

Ntuzahambwa mu Rwanda          Ntuzahambwa mu rwanda

Kandi na we nkubwire                  Ntuzahambwa mu rwanda

Ntuzahambwa mu Rwanda          Ntuzahambwa mu rwanda