JEAN Baptiste Byumvuhore

JEAN Baptiste  Byumvuhore

Nyamara ndi wowe Rwanda

 

Nyamara ndi wowe Rwanda

 

 

 

Rwanda, yewe Rwanda,    Rwanda barahiriraga kera

Ngo uri mwiza Rwanda ngo uri rugari Rwanda,

Ngo uratuje Rwanda ngo kandi ukagendwa,

Ngo ufite amashyamba kandi ukagira inzuzi,

Ngo ufite ibirunga kandi ukagira utununga,

 

None, none Rwanda None ko wikanze ubumanzi

Ko wari rugari Rwanda ntuheke abawe bose? Waba se warikanze ubumanzi

Ngo ufite imigezi arya maraso yatembaga Rwanda,

Ukagira inzuzi zigashoka imirambo,

Ngo ufite amashyamba burya se atwikiriye iki?

Ngo ufite inyamaswa jyewe nkaburamo inturo,

Ngatura ishyanga kandi uri rugari Rwanda,

 

Rwanda oya ntunyumve nabi  oya waya sigaho kandi ndababaye

Ngo wahuje ab’i Rwanda kandi utabafite bose

Ngo sinabona aho mba iyo ntagenda se mba ndi he?

Ngo haba intiti i Rwanda ariko ubanza utazizi,

Ngo ufite demokarasi ariko wasetsa Rwanda!

 

Rwanda yewe Rwanda      Rwanda oya waya

Urazira iki Rwanda aho ntibaba abo bana bawe,

Urazira iki Rwanda aho ntiyaba nyamweru,

Dore uhetse ababyeyi kandi uhetse ababyiruka Rwanda,

Dore uhetse izo mfubyi kandi uhetse abapfakazi,

Dore uhetse abakecuru kandi uhetse abakambwe

Nongereho iki Rwanda wowe nturora Rwanda?

 

Nyamara ariko Rwanda nyamara ariko Rwanda

     Nyamara ariko Rwanda jya wumva umuhanano

Nyamara ndi wowe Rwanda nakicara hasi

     Nakicara hasi nkahashaka igisubizo,

Nagenda ikirere nkahashaka igisubizo

     Nakibira uruzi nkahashaka igisubizo

Nkahashaka igisubizo kibakwiriye bose

     Bakareka ako gahinda bakareka imiborogo

 

Bakareka kuba imbata bakareka ako kanyaro

      Bakareka izima ryabo bagacira karungu

Bakareka izima ryabo bagahinduka intore

       Bagahinduka intore zibereye u Rwanda

 

Nahamagara uriya nkamutoza urukundo

     Nahamagara n’uyu nkamubuza kwirata

Nahamagara  bose nkabatoza kubana

     Nkabatoza kubana bakareka kuba imbata

Bakareka kuba imbata, imbata y’ubwibone

       Imbata  y’ubwikanyize imbata yo guhigana

 

Nabwira abahungu nti mucishe makeya

     Nabwira abakobwa nti mubyare abazubaka

Nabwira abahinzi nti dusangire imyaka

       Nabwira n’aborora nti dusangire ayera

Nabwira ababyeyi nti murere nta tiku

       Ntabwira ababyiruka nti mushungure ba sha

Nabwira umuzungu nti urambabarire cyane

       Nti jyana izo ntwaro sinzongera rwose

Nabwira abayoborwa nti mucishe makeya

       Nabwira abayobora nti muyoborane ubwenge

Napfukama ngasenga maze nkabisaba Imana

       Nti Mana uru Rwanda nti uruture umutwaro

 

Rwanda yewe Rwanda

Rwanda kandi urambabaje

Rwanda ariko Rwanda

Rwanda kandi ndakubwiye

Rwanda nyamara Rwanda

Rwanda kandi wumvise

Rwanda kandi Rwanda

Rwanda kandi ndizeye

 

Rwanda ariko  Rwanda wambyaye

Rwanda



14/07/2010
0 Poster un commentaire

A découvrir aussi


Inscrivez-vous au site

Soyez prévenu par email des prochaines mises à jour

Rejoignez les 1332 autres membres