JEAN Baptiste Byumvuhore

  Ubigenza nka njye

Umuntu, umuntu iyo akunze,

Yikundira kwiyumanganya

Umuntu, iyo akunze uwo yikundira,

Abyita umunezaro amahirwa n’imigisha maze,

Akabishyingura ahantu

Kuramba, babivuga batabizi,

Ko urukundo ruramba cyane,

Rukarandaranda

N’imitego n’imiziro n’imiziririzo

Rukabikanjakanjya ruciragura,

Rukomeza ubuziraherezo

Urwo ni rwo ni rwo rukundo ndirimba aha

R/Nizeye yuko aho uri hose,

Ubigenza nka njye

Ukampoza ku mutima wawe,

Ugakunda nkarusha

Abantu, bagutwara abo wikundira,

Nk’abatwika uruhira

Ukabareba ugapfira imbere

Bakabirukanka inyuma,

Nk’abahiga udukwavu

Ngo babice ururenze,

Urwo bishe uheruka.

Bakakwicira  umuntu,

Urukundo urusigaranye rwose

Aho ruteretse ni kure cyane,

Ntibahageza imyambi

Urwawe mukunzi, ruriyuburura

R/Nizeye yuko aho uri hose,

Ubigenza nka njye

Ukampoza ku mutima wawe,

Ugakunda nkarusha

.................................................................................... 

Uzambabalira,

Jye nabuze aho nyura nkwibuka

Kubera ko tudahuje amaraso,

Uzanyumva nawe uzampoza

Abantu ntibasobanukiwe,

Ko urukundo rurenga inzitiro

Ko rurenga n’imiryango yose,

Rugatambuka amoko

Rukarenga imbibi z’ibihugu,

Rukagendagenda n’i mahanga

Ndetse no mu ijuru kwa Jambo,

Tukagirayo abakunzi ba cyane

Na we wari umukiranutsi

 Abantu bakeka bibeshya,

Ko urukundo ruba mu maraso gusa

Mu bisanira no mu bikomangoma,

Nyamara rubasumbya kurora kure

Ntibamenye  ko ruba no ku murenge,

Mu bakina karere no mu bashumba

Mu mashuli no mu basicolaires,

Indatwa ndavuga Inkesha

Mu nsengero no mu gisilikare,

Muli korali no mu basuguti

Muli gereza no mu basominali,

Tukagirayo abakunzi ba cyane

Na we wankunze ubatunguye

R/Nizeye yuko aho uri hose,

Ubigenza nka njye

Ukampoza ku mutima wawe,

Ugakunda nkarusha

Bambwiye yuko habaho icyumba cya paradizo

Nibwira ko batambeshye

Ngo iyo ubaye umukiranutsi hano ku isi

Ugakurikiza ijambo rya Jambo

Usanga icyo cyumba giteguye

Nawe wari umukiranutsi

R/Nizeye yuko aho uri hose,

Ubigenza nka njye

Ukampoza ku mutima wawe,

Ugakunda nkarusha

R/Nizeye yuko aho uri hose,

Ubigenza nka njye

Ukampoza ku mutima wawe,

Ugakunda nkarusha